عَرْضُوا كِيسَانْكُم
عَرْضُوا كِيسَانْكُم نْصُبْ لِكُمْ من عِينِييَّا
ماتْحْتاجُوا مْجْمَرْ،لا عافِية راها تْكٌْدِي فِييَّا
عَرْضُوا كِيساْكُمْ،وْنْزِيدْكُمْ الدَّكَّة حْتَّى هِيَّ
ماعْنْدِي شِيبة،لانْعْناعْ ولا سُكَّارْ فْ الصِّينِييَّة
عَنْدِي غيرْ دْمُوعِي فْ خزَّانْ قَلْبِي مْثَقَّلْ عْلِيَّ
عَنْدِي غِيرْ دْموعِي الله إيجِيبْ لَما قَبْلُوا عْلِيَّ
دْموع حاجْبة غِيرْ منْ بابْ العِين الطَّلْ عْلِيَّ
دْمُوعْ مَقْهورة ،زِيزُونَة،كِفاشْ تْعَبَّرْ الزُّغْبِيَّة
دْموع حْنِينة،رْزِينَة ما تْصْرْخْ أو حَشُّومِيَّة
عَرْضُوا كِيسانْكُم يا جِيرانِي وْحْبَابِي أو المَّالِيَّة
وْتْمَتْعُوا بْدْموع طايبَة عْلَى الرْماد كِ الطَّنْجِييَّة
رماد شعْلُو قَلْبِي يُومْ ماتْ بُويا المُومُّو دْ عِينِييَّ
رْمادْ من الفوق باردْ والدَّاخْلْ الله اللِّي عالْم عْلِيَّ
رْمادْ من الفوقْ باردْ وْالدَّاخْلْ فْ داتِي يْشْوِي لِيَّ
إيقَطَّعْنِي بْلاَّتِي أو فْ القُضْبانْ إيزَلَّكْْ فِيِيَّا
إيزَلْْكٌْنِي فْ قْضْبانْ العْذابْ وِوَكَّلْ ذاتِي لِييَّا
عَرُْضُوا كِيسانْكُمْ نْسْقِيكُمْ دْموع أَثَرِيَّة
غِيرْ بْشْوِيَّ عْلِيها راها عْياتْ الحَشُّوِميَّة
غِيرْ بْشْوِيَّ عْلِيها راها رْشاتْ المْنْسِيَّة
غِيرْ بْشْوِية عْلى جَدَّةْ دْموعِي السَّكُّوتِيَّة
غِيرْ بْلاَّتِي خَلِيوْها تْنْزْلْ بْعُكَّازْها المْحْنِيَّة
اللِّي وَقْتْ الصَّدْمة ما طَيْحاتْ رْكابِييَّا
اللِّي وَقْتْ فْراقْ دْمِّي سْدَّاتْ الباب عْلِيَّ
فراقْ البَّا الحْنِينْ اللِّي خْطْفاتُو المَنِيَّة
فْراقْ رُوحِي،هِيَ واقْفَة وانا تالْفة بِيَّ
عَرْضُوا كِيسانْكُم يا جِيرانِي وْحْبَابِي أو المَّالِيَّا
نَرْوِيكُمْ كِيما رْوِيتُونِي يُوم غابْ العزيزْ عْلِيَّ
بْكِيتُوا حْثَّى بَرَّدْتُوا أو ماخْلِّيتُولِي حَقِّي شْوِيَّ
بْكِيتُوا والنَّارْ طْفِيتُوا وانا نارِي ماهِي مْطْفِيَّة
رْمادْها حامي من زْمان ما بْغَى إي بَرَّد عْلِيَّ
ما عْلْمُتُونِي نْجْي طايْرَة وْغْدايْدِي تْبْرْدْ لِيَّ
ما عْلْمْتُونِي بْمُوتُو من البُعْدْ كُنْتُوا خايْفِينْ عْلِيَّ
بْكِيتُوا أو بْرْدْتُوا وانا داخْلة لْ بْلادِي بْاللاَّتِي عْلِيَّ
نْحْلَمْ نْبُوسْ أو نْشم ريحة أمِّي وْنْعَنَّقْ الغالي عْلِيَّ
نْحْلْمْ بْ بْلادِي أو كُْلْسة الوالْدِين الكُْلْسة الثقْلِيدِيَّة
لْقِيتْ أُمِّي لابْسة ل أبْيض وْ الخُّوتِي إيشُفُوا فِيَّ
هُما بْكاوْا أو عْياوْا وانا بْكايا ما بْغى إي سلَّمْ عْلِيَّ
وْاللاَّتْ دْمُوعِي تْقَطَّرْ فْ ورْدْ لِيَّامْ وْتْسْتَّفْ لِيَّ
مْعَصْرَّة نُقْطَة بْنُقْطة فْ خابِيْةْ قَلْبِي تْعَمَّرْ لِيَّ
جيت نْسْقِيكُمْ ما ورد قَلْبِي اللِّي تْقَطَّرْ عْلى يْدِّييَّا
عَرْضُوا كِيسانْكُمْ وْ تْلَدْدُوا البْنَّةْ اللِّي كانْتْ مْخَبِّية
عَرْضُوا كِيسانْكُمْ ذوقُو عْسل قلبي وْرُدُّو الخْبارْ عْلِيَّ
عَرْضُوا كِيسانْكُم باشْ على الأقَلْ تْحْسُّوا بِيَّ
وْتْشْفُوا مْرايْةْ قَلْبِي وذاتِي اللِّي فْ السرير مَرْمِيَّة
وْ تْجُولُوا فْ عَقْلِي وْتْكّْولوا حْسن عْوان الدّْرِّيَّة
خَلِّيوْنِي نْسُوسْ غُبْرة هَمِّي أو نْوْقفْ عْلى رْجْلِيَّ
خَلِّيوْنِي نْحْفْرْ عْماقِي أو نْجْبْدْ كَنْزْ ضَحْكَة الحُرِيَّة
خَلِّيوْنِي نْشَطَّحْ حْرُوفِي تْوْلِّي كْلام وْأشْعارْ تْغَنِّي لِيَّ
خَلِّيوْنِي نْلْعَبْ بْحْرُوفِي عْلى كْتابِي بْحالْ الصَّبِيَّة
خَلِّيوْنِي نْبَكِّي كْلامِي يْمكْنْ تْخْرج دموعِي الأثرِية
تْنْزْلْ شْلالاتْ من جْبل عيونِي خلاّبة طَبِيعِيَّة
تْوَلِّي عْوينَة نابْعَة تْغَدِّي الرُوحْ بالرومانْسِية
هما بْكاوْا وْعْياوْا وانا بْكايا تْكَمَّشْ وْتْخْلَّى عْلِيَّ
عْييِتْ نْزاوْكُْو، دْفَعْنِي وْهْرْبْ لْ عْماقِي وْتْرَكَّن فِي
عْيِيتْ نْرْغْبُو،غْضْبْ وْ بْدى يْرَيَّبْ ذاتِي كل مرَّة شْوِيَّ
خَلِّيوْنِي نْلْعَبْ بْحْرُوفِي وْنْشْتْتْها عْلى كْتابِي وْ تْحَمَّرْ فِيَّ
نْخَيَّطْها بْمْدادِي أوفْ صندوق عَقْلي تْوَلِّي صفحة مْطْوِيَّة
عَرْضُوا كِيسَانْكُم نْصُبْ لِكُمْ من عِينِييَّا
